Verslag van Clive Derby-Lewis (24 Sept 2010) PDF Afdruk E-pos
Maandag, 27 September 2010 16:53

(http://www.afrikanervolksparty.org/index.php?option=com_content&view=article&id=4055%3Averslag-van-clive-derby-lewis&catid=16%3Apolities&Itemid=185&lang=en)

Clive Derby-Lewis

deur Marius Coertze, prokureur van Clive Derby-Lewis

Clive Derby-Lewis kan nog steeds nie uit die hospitaal ontslaan word nie, ongeag die verbete stryd van ses dokters se pogings om sy gesondheid te verbeter.

Gangrene

Clive is Maandag 20 September in die hospitaal opgeneem as gevolg van ‘n akute toestand van gangrene in sy regter onderbeen.

Hy is Dinsdag 21 September daarvoor geopereer en dooie weefsel van 8cm x 6cm (omtrent se groot soos ‘n man se vuis) is uit sy been verwyder. Hy is daarna met binne-aarse antibiotika behandel om die gangrene te probeer stop. Die wond is oopgelaat om te dreineer en die wonddekkings word gereeld gewissel in ‘n poging om die wond steriel te hou.

Die been is tans nog geswel en die kursus antibiotika is voltooi. Die swelling dui daarop dat die stryd teen die gangrene nog nie gewen is nie. Mnr Derby-Lewis is op ‘n tweede en sterker kursus antibiotika geplaas om die gangrene te stop.

Hy is egter in ‘n erge verwaarloosde en mishandelde toestand uit die gevangenis opgeneem en dit is nog nie seker of sy been gered kan word nie. As die gangrene nie vinnig verbeter nie, sal sy regter onderbeen afgesit moet word om verspreiding van die gangrene na die res van sy liggaam te voorkom.

Hoë bloeddruk

In die kliniese ondersoek van mnr Clive Derby-Lewis by sy eerste opname in die hospitaal, het dit geblyk dat sy bloeddruk lewensgevaarlik hoog is (172/140). Die medici het begin om medikasie te verskaf om sy bloeddruk onder beheer te bring. Sy bloeddruk is tans onder beheer, maar sal heel waarskynlik weer onstabiel raak, sodra hy terug keer tronk toe en die goeie mediese behandeling wat hy tans ontvang, ontbeer.

Kanker

By opname het die dokters ‘n verspreide velkanker aan Clive se regter voorkop bemerk. Die kanker strek van die haarlyn by sy regterslaap tot by die oogbank en dek ongeveer ‘n area van 5cm X 5cm. Volgens die sjirurg, dokter Durand, se medeling aan Clive, neem velkanker ‘n geruime tyd om so groot te word en dui dit daarop dat dit reeds oor ‘n lang periode (twee jaar of langer) presenteer het. Die kanker is so diep dat dit spontaan bloei. Biopsies van die velkanker het bevestig dat dit wel aggressiewe velkanker is wat dringend behandel moet word.

Verdere bloedtoetse wat op mnr Derby-Lewis gedoen is, dui daarop dat hy waarskynlik ook prostaat kanker kan hê. ‘n Uroloog se dienste gaan betrek word om hierdie diagnose te bevestig.

Behandeling

Dr. Durand het Clive meegedeel dat sy toestand die gevolg is van growwe nalatigheid en mishandeling van Clive. Hy is van opinie dat enige mediese praktisyn sonder moeite die diagnose van verskeie siekte-toestande waaraan Clive ly, kon maak.

Marius Coertze, Clive se prokureur, sê dat Korrektiewe Dienste duidelik bewus was van sy kroniese en akute mediese toestand, maar dit waarskynlik verwyg en verwaarloos het, in die hoop dat Clive aan sogenaamde “natuurlike oorsake” sal sterf. Korrektiewe Dienste se klandestiene en onmenslike verwaarlosing van Clive sou dan maklik onder die mat ingevee kon word.

Mishandeling

Departement van Korrektiewe Dienste se skokkende mishandeling van Clive, ‘n 74-jarige bejaarde man, duur steeds voort, selfs binne-in die hospitaal, volgens mnr Marius Coertze. Tydens die operasie van sy been, het Clive se twee bewaarders aangedring om rondom die operasietafel te staan in die teater, terwyl die operasie uitgevoer word. Dit het die werk van die dokters belemmer en was ‘n oorlas.

Eers nadat Marius Coertze, Clive se prokuereur, gedreig het om die bewaarders vir minagting van die hof te laat vervolg, het hulle ingestem om buite die deur van die teater te wag en deur die venster die operasie dop te hou. Die span dokters het erge beswaar gemaak oor hierdie insident in die teater. Dit belemmer die dokters se werk en veroorsaak ‘n risiko van infeksie en die verspreding van kieme in die teater. As ‘n reël word geen persone wat nie deel van die teater-span vorm in die teater toegelaat nie.

Die tronkbewaarders het mnr Derby-Lewis aan sy hospitaalbed vasgeketting. Hy kan glad nie opstaan en rond beweeg nie. Dit is noodsaaklik dat ‘n pasiënt post-operatief voldoende beweging kry om bloedklonte te vermy. Bloedklonte wat nou ontstaan, kan trombose in die been of hart of embolisme in die long veroorsaak. Ten einde hierdie trauma en selfs dood te voorkom, word hy nou behandel met bloedverdunnende middels. Dit is die gevolg van Korrektiewe Dienste se houding om ‘n 74-jarige bejaarde man aan sy hospitaalbed vas te ketting.

Dokters is geskok dat die tronkpersoneel onbeskaamd en openlik, terwyl mnr Derby-Lewis onder mediese behandeling is, poog om sy gesondheid te benadeel deur die dokters te verhinder om hom te behandel en in stryd met die medici se opdragte op te tree. Een bewaarder wou selfs vir dokter Durand verhinder om Clive vanoggend, 24 September, te ondersoek omdat hy sê hy ken nie die dokter nie en weet nie of hy in die kamer toegelaat mag word nie.

Die nuutste voorval van Korrektiewe Dienste se onmenslike houding teenoor Clive Derby-Lewis is dat mev Gay Deby-Lewis nie toegelaat word om hom te besoek nie. Sy is slegs een besoek aan mnr Deby-Lewis vergun. Sy het hom gister besoek. Sy word gedwing om telkens meer as ‘n uur te wag vir ‘n skriftelike toestemming om hom te besoek. So ‘n skriftelike toestemming is slegs vir een besoek van 45 minute geldig. Dan moet sy die volgende dag weer na die tronk toe gaan vir ‘n nuwe toestemming. Die Pretoria-Sentraal Gevangenis se administrasie is gesluit vir die lang naweek, met die gevolg dat niemand hom gedurende die naweek sal kan besoek nie.

Die tronk het ook aan hom vorms verskaf om te teken. Hy sê dit kom daarop neer dat hy persoonlik vir die bewaarders wat hom oppas se vergoeding moet betaal. Mnr Coertze kon hom nie adviseer oor die regsimplikasies van die vorm nie, aangesien hy toegang tot mnr Derby-Lewis geweier word.

 

Marius Coertze
Prokureur van Clive Derby-Lewis, 24 September 2010.